Gen 27 | TVK | STEP | Huram xil mei di mitavi, e Aesak mei be mometu e meten bar. Vatei, misa sepinien ba mi natneli xa be muimol tengan vamei mu visali. Melele xa Esao bemei, Aesak misisi bit, “?Natuxuli, xouk mak xiak?” Ma Esao bit rilomun ni mini bit, “Io, inou xiak?”

Genesis 27

Siekob, Nat Aesak, Mikan ni Tuxolxatien na Muimol e Milesae Be Ut Sav

Senesis 27:1-46; 28:1-5

1 Huram xil mei di mitavi, e Aesak mei be mometu e meten bar. Vatei, misa sepinien ba mi natneli xa be muimol tengan vamei mu visali. Melele xa Esao bemei, Aesak misisi bit, “?Natuxuli, xouk mak xiak?”

Ma Esao bit rilomun ni mini bit, “Io, inou xiak?”

2 Aesak biteni mini bit, “?Opusi? Inou nabe mometu ngamu xiak, e navahi, nimat. 3 Mak, ma uleh tuvasim nam e uhe xol suse, ha uhas vuran tova avan. 4 Ukuk ni, von ikon, ixoni ngan xa inou ieok bei. Melele xa nia ni ivus, nisa tuxolxatien kor navan te muimol minuk, vengan natakil ti xa vilieh nimat.”

5 Melele xa Aesak di misepin mi Esao, Rebekah di milong xuxus ni naha xa di biteni. E melele xa Esao be xol suse, 6 Rebekah biteni mi natneli Siekob bit, “Nalong naha xa tamom biteni mi Esao. 7 Xi biteni mini mak bit, 'Uhas vuran tova avan e ukuk ni, von ikon, ixoni ngan xa inou ieok bei. Melele xa nia ni ivus, pe met Iahova, inou nisa tuxolxatien navan minuk vengan natakil ti xa vilieh nimat.'” 8 Di, Rebekah biteni mun mini bit, “Natuxuli, uteong ni nou e upol ni naha xa inou nihiteni minuk. 9 Uhe ut xa di lalaxat sipsip e nani sar xil en, e uleh nani ihe lu xa lukaio kuhi. Ti, uhas xalu lalimat e inou nikuk ni xalu ixoni ngan xa tamom ien bei. 10 Ti, xouk ha usa ni mini. E melele xa ia ni ivus, ma xi isa tuxolxatien nan minuk. Bos xa ipol ni minuk taxeak, vengan xa ratakil ti vileah imat.”

11 E Siekob biteni mi ninen bit, “?E midep, ahbok tovuol e ahbe Esao holu? 12 E xosxa tata ituxol veok, ikila xa tave Esao ti xiak e ikila xa di naluvosi. Uluk mikan xa tata en nat nou toma, nasa ti tuxolxatien minou, e nasa halesil sung mei napurun meulien navan.”

13 Ninen biteni mini bit, “Natuxuli, xosxa imak, ma halesil ak napurunuk ti, e ipurunou kestang. Ukaten, upol ni ixoni ngan xa di nabiteni xiak. Ha uleh nani ihe lu imei visal nou.” 14 Misak ni, xi ba milehi bemei, e ninen mikuk ni nggoni ngan xa tamen ien bei. 15 Di, Rebekeh nggur eising hos na Esao xa tesi revi teta, e mising xol Siekob ni. 16 Bus di, nggur hilbe nani e mikavet xol hen xalu e hiraen ni. 17 Melele xa bue xati bus, misa anien hos xa von mikon mini del beret xa pol ni.

18 Di, Siekob be visal tamen e mikesi bit, “!Tata!”

E tamen bit rilomun ni mini bit, “!O-o, inou iaxale! ?E xouk si xai?”

19 Ma Siekob bit, “Inou Esao, muimol nam. Napol ni nggoni ngan xa otehiten ni minou. Mea, utotan kuhi e ua vuran ak xa nalehi bemei xiak. E melele xa ua ni ivus, ma ukila usa tuxolxatien kor nam sung minou.”

20 Aesak bit, “?Natuxuli, otekamet temanon ni tetep?”

Siekob bit rilomun ni mini bit, “Iahova, Hi nam, iaxa dutou ni nou.”

21 Aesak biteni mini bit, “Amei totan sangas visal nou tengan inou nikila nituxol kilak xa xouk Esao tamak.” 22 Misak ni, Siekob be visali e tamen duxol hen e biteni bit, “Raem nggoni Siekob, e hem xalu nggoni Esao.” 23 E mile ras Siekob vari vengan xa ahben holu nggoni Esao. Ma xi pol ni nenemien nan tengan vasa tuxolxatien nan mini. 24 Di, misisi mun bit, “?Xouk natuxoli Esao tamak xiak?”

E Siekob bit, “Io, inou mak.”

25 Misak ni, Aesak biteni mini bit, “!Sa anien xai nama ni! Nia ni ivus, ti, nituxol xatuk.” Ma, xi ngguri, misa ni mini, e misa uaen mun dela. 26 Di, tamen biteni mini bit, “Natuxoli, umei visal nou e nipo xatuk.” 27 Melele xa po xati, Aesak pongos kila xa eising be na Esao mak, ma misa tuxolxatien nan mini bit,

“Natuxuli, vom bos xa bos
nggoni vo hungovae xil te xol suse e melele xa Iahova misa us bemei mikasi.
28 Hi isa nin te ut nesao imei minuk
mei ikas naho sam xil e isak ni xouk upus hosien e meulien nam.
Ipol ni anien sam xil te naho lihe holu
e urvatiei te grep sam xil mun litaxao kuhi.
29 Hi ipol ni moletin xil lipol minuk.
Reitin, moletin xil te kantri sav xil mei limerere ni xouk.
Xouk uhe suv na tumali xil,
e tuten na ninom xil mei limot minuk.
Moletin xa ti ipol ni halesil minuk, Hi ipol ni halesil mini.
E ngan xil xa lisa sepinien te tuxolxatien minuk, Hi ituxol xat xil.”
30 Melele xa Aesak duxol xati bus, Siekob be relingi ba. Mistal ba vuteili tang, tuneli Esao nggo xol suse bemei. 31 Xi mun mikuk ni anien hos tei xa vin mikon e ngguri ba tengan tamen va ni. E biteni mini bit, “Tata, mea li, totan e a vuran xa ngguri bemei xiak. Ivus, ti, usa tuxolxatien nam minou.”

32 “?E xouk visi ak?”

Esao bit, “Inou Esao, xa nabe muimol nam.”

33 Melele xa Aesak milonge mak, mite manin e malili holu. Xi misisi bit, “?E visi iaxa tehas vuran tei e tehuri temei visal nou? Nangganien bus taxeak, e xouk ostal. Nasa sein tuxolxatien kor navan xil mini ngamu, e nasakras namilesi. Tuxolxatien ak iti en vehakut.”

34 Melele xa Esao milonge mak, milonge misa holu pupu e muis kei be nesao bit, “!Tata, duxol xat nou mun!”

35 E Aesak bit rilomun ni mini bit, “Tumali temei teluvos nou e tehur vuol ni tuxolxatien nam xil ngamu.”

36 Esao biteni bit, “Be valu xiak xa xi tepol ni luvosen minou. Hisen xa be Siekob momal tevi. ^{▼▼27:36 His xa Siekob, koute tei mun teni be 'moletin te luvosen'.} Diamu, xi tehur rat voninok te muimol ra nou, e xosali, tehur rat tuxolxatien te muimol mun ra nou. ?E midep, otaling ti rut tuxolxatien nam vata vahe navan?”

37 Aesak bit rilomun ni mini bit, “Xi, napol ni tuei mei be suv nam, e napol ni tuneli xil vus mei lihe moletin te polien nan xil. Nasis tuei mi Hi tengan isa anien itel uaen mini. Natuxoli, neta tovuol mun tengan nasa ni minuk.”

38 Esao nggulehi di dak kes tamen bit, “?Tuxolxatien nam tei takes? !Tuxol xat nou li mun! !Tata, tuxol xat nou li mun!” E muis kei be nesao.

39 Misak ni Aesak biteni mini bit,

“Hi nasa nin te ut nesao ti mei nakas naho nam xil,
e onapus ti vari hosien e meulien nam.
40 Xouk uti ni vaeen tang e ukixat xat tiei nam vehakut.
E tave ti neta, xouk uhe moletin te polien na tumali.
E itutou, melele xa uhiles e usin ni xeihen nan,
onate pe hen ti mun.”
41 Ma Esao, xi nggur xat ekaten nan ba xat Siekob ve tuxolxatien kor xa tamen tesa ni mini. Misak ni, minem tasen ni bit, “Melele te tangen ve tata navan di bemei sangas. Ma itutou ni, nihas vin Siekob sung.”

42 Melele xa Rebekah milongeong ni lingxatien na Esao, xi misilasil ve Siekob tengan vamei visali. Melele xa bemei, xi biteni mini bit, “Natuxuli, uteong ni nou. Tumali di misoson xuxus ni ekaten nan, e lingxatien nan da tengan ihasuk umat. 43 Taxeak, upol ni naha xa inou nihiteni. Utemanon, ha ute sotin visal tua navan Leban xa de ut Haran. 44 Ha ute visali ituxoh melele xa ekaten na tumali ihe tan. 45 E melele xa en ibong ni naha xa otepol ni mini, nisil moletin tova ihat ihur rilomun ni xouk umei. Uluk mikan xa xi nahasuk onamat, e xi mun linalepisi e linahasi namat. Ieok ti tavei xa xamil vus mulomat reling nou vat takes.”

46 Misak ni, Rebekah be visal Aesak e biteni mini bit, “Veok buol tova tang ni sexien na ate-Hitaet xalu xa Esao mileh xalu. Xosxa Siekob mun ihur ate-Hitaet tova, ma bos mak mu xa inou mun nimat tang.”